Translating:Lib.reviews/FAQ/ia

Proque lib.reviews?

Nos crede que le information que nos usa pro prender decisiones -- como qual libro leger, in qual loco allogiar se, o qual producto comprar -- essera de qualitate superior si nos lo organisa de maniera transparente, per medio de un communitate aperte. Nos applica alcunes del principios pro le quales projectos como Wikipedia e OpenStreetMap ha essite pioneros: un base de codice fonte aperte, licentia aperte de tote le contento, e nulle scopo de lucro.

Isto tamben nos permitte collaborar con iste e altere projectos existente pro colliger e organisar metadatos libere e aperte sur interprisas, productos, et cetera.

Como assecura vos le qualitate de recensiones?

Pro le momento, nos requesta que le usatores obtene un ligamine de invitation ante de inscriber se. Isto es un maniera simple de controlar le crescimento e apprender qui refere nove usatores al sito, de sorta que nos pote vigilar le qualitate durante que nos cresce e evitar devenir inundate con spam ab initio.

Con le tempore, nos ha alcun ideas pro mantener/augmentar le qualitate:

• Le equipas es un maniera in que usatores que ha un interesse commun pote collaborar. Tu pote optar pro sequer solmente le recensiones facite per un equipa specific, lo que forni un "lente de qualitate" inherente, perque cata equipa pote establir su proprie regulas de participation.
• Nos poterea introducer votos positive/negative, manieras de accentuar recensiones per usatores digne de fide, algorithmos de score transparente, o instrumentos de conversation del communitate pro identificar le melior recensiones sur un thema specificate.
• Nos pote invitar collaborationes con gruppos e individuos qui ha un historia de applicar expertise a un dominio date (p.ex., recensiones de automobiles).

Ha un idea? Proque non condivider lo sur nostre canal IRC (#lib.reviews sur irc.freenode.net) o a transverso nostre lista de diffusion?

Como deteger/evitar recensiones pagate?

Il non ha alcun modo de garantir que un usator non ha essite compensate de alcun maniera pro un recension que ille scribe sur internet. Pro iste ration, nos non lo prohibi absolutemente, ma per favor tene in conto que existe investigationes que monstra que mesmo micre incentivos, como monstras de producto, tende a prejudiciar le recensiones. Nos non permitte le auto-promotion e nos exige que usatores revela clarmente le conflictos de interesse in lor recension. Isto significa que tu debera indicar omne forma de compensation que tu expecta de reciper o ha recipite (incluse monstras de productos). Non es acceptabile que usatores scribe recensiones in le quales le opinion del recensente ha essite predeterminate per un tertie parte que offere compensation, e nos blocara le usatores que face isto.

In general, nos vole construer un communitate ubi usatores comencia a cognoscer se, incontrar se facie a facie, e auto-organisar se pro discoperir problemas de qualitate. Technologia como mentionate antea es un parte de isto, ma conversation e politica es equalmente importante. Nos te incoragia a abonar te a nostre lista de diffusion communitari pro adjutar nos a elaborar iste e altere questiones.

Como crea io un version de lib.reviews in mi lingua?

Nos usa [https://translatewiki.net/> translatewiki.net como platteforma pro le traduction del interfacie de usator. Translatewiki.net ha evolvite parallelmente con Wikipedia pro supportar le traduction del interfacie de usator de Wikipedia e su projectos fratres in multe linguas, e ora es usate etiam per altere projectos de codice aperte. Illo mesme consiste completemente de codice aperte.

Tu pote vider le progresso de differente versiones linguistic hic. Si tu es nove a translatewiki.net, post que tu te inscribe, illo te demandara de facer 20 micre traductiones de exemplo. Isto es un typo de proba extense que "monstra que tu sape lo que tu face"; illo prende circa 10 minutas. Un vice que tu conto es approbate, visita iste pagina e selige le lingua in le qual tu traduce in le angulo superior a dextra.

Linguas es activate in qualque dies quando illos attinge le completion de 100%. Actualisationes generalmente es synchronisate duo vices per septimana.

Paginas como iste es etiam mantenite e traducite via TranslateWiki.net, vide iste pagina pro plus information.

Proque le codice es sub le licentia CC-0 e non un licentia conventional de codice aperte?

CC-0 es juridicamente le via le plus secur pro poner qualcunque pecia de contento (texto, imagine, codice, et cetera) in le dominio public in un maniera que resiste al scrutinio sub legislation international. Como nos non ha intention de exequer actiones judicial contra alcun persona pro lo que face con le codice de lib.reviews, un licentia que da a re-usatores maxime libertate con minime friction pareva un option rationabile. Tene in mente que le codice de lib.reviews depende de bibliothecas de tertie partes licentiate sub diverse licentias de codice aperte.

Como se sustene lib.reviews? Existe un plano de negotios?

Pro ora, le personas travaliante sur lib.reviews es totes voluntarios qui travalio sur le projecto sin remuneration, in lor tempore libere. Si e quando nos attinge le limite ubi nos senti que le projecto es sufficientemente matur e utile pro justificar le petition de appoio public, nos probabilemente comenciara per adder ligamines pro donationes e establir mechanismos juridic pro le deducibilitate fiscal.

Si tu desira appoiar le projecto in un maniera major ante isto (comprendente que illo sempre essera sin publicitate e sin lucro), senti te libere a contactar le fundator del projecto, Erik Moeller, a eloquencegmail.com.

Que es le relation inter lib.reviews e freeyourstuff.cc?

freeyourstuff.cc es un extension de navigator disveloppate per Erik Moeller que te permitte exportar recensiones e altere contributiones que tu ha facite a sitos web proprietari como IMDB e Yelp. Optionalmente, tu etiam pote liberar iste contributiones sub un licentia libere sur le sito web freeyourstuff.cc, permittente a quicunque de re-usar los. In le longe termino, nos desira render lo facile importar contributiones a lib.reviews con le adjuta del extension, ma pro ora, il non existe ancora un interfacie directe inter le duo projectos.