Project:Régole ëd confidensialità

But general

Si regolament a coato j'anformassion përsonaj identificàbij cujìe o memorisà da translatewiki.net sij sò servent an relassion al proget e a soa comunità. Translatewiki.net a cheuj e a ten l'ùltim ansema d'anformassion përsonaj identificàbij necessarie a sodisfé jë bzògn operassionaj dij proget.

La natura pùblica e colaborativa dël proget

Translatewiki.net a l'é dësvlupà an colaborassion dai sò utent ch'a deuvro ël programa MediaWiki. Tuti coj ch'a l'han otnù ij përmess ëd modìfica a peulo modifiché le pàgine modificàbij d'ës sit quand ch'a son intrà ant ël sistema com utent registrà. An fasend sossì, j'editor a creo un document publicà, e na registrassion pùblica ëd minca paròla giontà, gavà, o modificà. Sossì a l'é n'at pùblich, e j'editor a son identificà publicament com j'autor ëd costi cangiament. Tute le contribussion fàite a sto proget, e tute j'anformassion pùbliche disponìbij a propòsit ëd coste contribussion, a son smonùe ëd fasson irevocàbil an licensa e a peulo esse copià, sità, utilisà torna e adatà da 'd terse part ëd fasson lìbera, con pòche restrission.

Atività su translatewiki.net

An general, costa régola a s'àplica mach a j'anformassion privà memorisà o mantnùe da translatewiki.net che a son pa disponìbij ëd fasson pùblica.

J'anterassion con translatewiki.net nen coatà da coste régole a ancludo j'aspet relativ a la navigassion e a la modìfica dle pàgine, l'usagi dla funsion «mëssagi a n'utent» dla wiki, e nen mach. Coste anterassion a peulo rivelé l'adrëssa IP d'un contributor, e miraco d'àutre anformassion përsonaj, sensa distinsion al pùblich general, o a partìe specìfiche ëd volontari ch'a agisso ëd fasson indipendenta da translatewiki.net.

J'utent a peulo ëdcò anteragì con d'àutri fòra ëd translatewiki.net, via pòsta eletrònica, IRC o d'àutri sistema ëd ciaciarade, o un sit an sl'aragnà indipendent, e a dovrìo conòsse j'arzigh colegà, e ij sò përsonaj bzògn d'arzervatëssa, prima ëd dovré ste manere ëd comunicassion.

Cont d'utent e paternità

Translatewiki.net a ciama a j'editor ëd registresse con sò sit an sl'aragnà, bele che chèich pàgine a peulo esse modificà sensa intré ant ël sistema con në stranòm d'utent, e an col cas a saran identificà da l'adrëssa IP dla rej. J'utent ch'as registro a saran identificà da sò stranòm. J'utent a serno na ciav, che a l'é confidensial e dovrà për verifiché l'integrità ëd sò cont. Gavà andoa ch'a sia obligatòri për lej, gnun a dev rivelé, o smon-e an ciàir, ni le ciav d'utent ni ij bëscotin generà për identifiché n'utent. Na vira creà, ij cont dj'utent a saran nen eliminà, gavà ch'a-i sia na ciàira antension grama, second ël giudissi dl'echip ëd translatewiki.net. A podrìa esse possìbil ëd cangé në stranòm. Translatewiki.net a garantiss pa che në stranòm d'utent a sarà cangià su arcesta.

But ëd la cujìa dj'anformassion përsonaj

Translatewiki.net a lìmita la cujìa dij dat përsonaj identificàbij ëd l'utent ai but ch'a servo a fé marcé bin ij sò proget, comprèis lòn ch'a-i é sì-dapress (ma nen mach sòn):

Për amelioré la responsabilità pùblica dël proget. Translatewiki.net a arconòss che minca proget ch'a l'é duvert bastansa për përmëtte la partecipassion pi gròssa possìbil dël pùblich an general a sarà ëdcò vulneràbil a serte sòrt d'abus e comportament pa produtiv. Translatewiki.net a l'ha stabilì na quantità ëd mecanism për preven-e o rimedié a d'atività abusive. Për esempi, quand a s'invéstiga su n'abus sël proget, comprèis l'usagi suspet ëd buratin malegn (cont duplicà), vandalism, cimenté d'àutri utent, o comportament distrutiv, l'adrëssa Ip dj'utent (pijà sia da coj andrinta al sistema o da la memorisassion ant la base ëd dàit) a peul esse dovrà për identifiché le sorgiss dël comportament abusiv. Costa anformassion a peul esse condividùa da j'utent con j'autorità aministrative ch'a son ancarià ëd protege ij proget.

Për smon-e dle statìstiche dël sit. Translatewiki.net a campion-a da na mira statìstica ij dat ëspòrch dij registr dle vìsite dj'utent. Si argistr a son dovrà për produve dle pàgine dë statìstiche dël sit; ij dat ëspòrch dij registr a son pà rendù pùblich.

• Për arzòlve dij problema técnich. Ij dat dj'argistr a peulo esse esaminà dai dësvlupador con ël but d'arzòlve dij problema técnich e a ëd trové ij trigomiro malfasent che a apesantisso ël sit.

Translatewiki.net a peul carié dj'arsorse com JavaScript da d'àutri servent, ch'a peulo toché l'arzervatëssa dl'utent (për esempi Google Adwords o dj'agiut a la tradussion). A l'é responsabilità dl'utent ëd limité l'esposission ëd detaj nen vorsù an rason dj'arsorse carià da dij servent estern.

Detaj dël mantniment dij dat

Aspetative generaj

Adrëssa IP a àutre anformassion técniche

Quand un visitador a ciama o a les na pàgina, a son pa cujìe pi d'anformassion che cole pijà ëd sòlit dai sit an sl'aragnà. Translatewiki.net a peul goerné ij registr ëd coste transassion, ma costi-sì a saran pa publicà.

Quand che na pàgina a l'é modificà da n'editor intrà ant ël sistema, ël servent a memorisa an manera confidensial j'anformassion dl'adrëssa IP relative për un temp limità. Coste anformassion a son ëscancelà ëd fasson automàtica apress un temp fissà. Për j'editor ch'a intro pa ant ël sistema, l'adrëssa IP dovrà a l'é arconossùa ëd fasson pùblica e përmanenta com l'autor dla modìfica. A peul esse possìbil për na tersa part identifiché l'autor da costa adrëssa IP ansema con j'àutre anformassion disponìbij. Intré ant ël sistema con në stranòm registrà a përmët ëd goerné pì d'arzervatëssa.

Bëscotin

Ël sit a ampòsta un bëscotin temporani ëd session an sl'ordinator dl'utent quand na pàgina a l'é visità. Ij letor ch'a veulo pa intré ant ël sistema o modifiché a peulo arfudé ës bëscotin; a sarà scancelà a la fin dla session dël navigador. Vàire bëscotin a peulo esse ampostà quand un a intra ant ël sistema për manten-e sò statù d'utent intrà ant ël sistema. Se un a salva në stranòm o na ciav ant ël navigador, cola anformassion a sarà salvà fin a 30 di, e st'anformassion a sarà mandà al servent për tute le vìsite a 's proget. Ij contributor ch'a deuvro na màchina pùblica e che a veulo pa mostré sò stranòm a j'utent sucessiv dla màchina a dovrìo scancelé sti bëscotin apress dl'usagi.

Stòria dla pàgina

Le modìfiche o d'àutre contribussion al proget an sle tradussion, le pàgine dj'utent, le pàgine ëd discussion e d'àutre pàgine a son ëd sòlit goernà për sempe. An gavand dël test dal proget as lo scancela pa ëd fasson përmanenta. Ëd sòlit tuti a peulo vardé na version precedenta ëd na pàgina e vardé lòn ch'a-i era. Bele se n'articol a l'é «scancelà», n'utent ch'a l'ha 'n livel d'acess pi àut a peul anco' vëdde lòn ch'a l'é stàit gavà da la vista pùblica. Dj'anformassion a peulo esse gavà ëd fasson përmanenta da j'utent con acess a Translatewiki.net, ma gavà le ràire vire che translatewiki.net a dev ëscancelé ël material dla stòria dle modìfiche rispòsta a n'órdin legal o na procedura legal equivalenta, a-i é gnun-e garansìe ch'a-i sio dë scancelassion përmanente.

Contribussion dl'utent

Le contribussion dj'utent a son ëdcò agregà e disponìbij al pùblich. Le contribussion dj'utent a son agregà conforma a soa anscrission e stat d'identificassion. Ij dat an sle contribussion dj'utent, parèj ëd cole ansima a quand j'utent a l'han modificà e ël nùmer ëd modìfiche che a l'han fàit, a son disponìbij al pùblich a travers dle liste dij contribù dj'utent, e an forme agregà publicà da d'àutri utent.

Lese ij proget

A son pa cujìe pi d'anformassion ansima a j'utent e a j'àutri visitador ch'a leso le pàgine rispet a cole ch'a son colessionà ëd sòlit ant ij registr dij servent dai sit an sl'aragnà. Gavà costi dat ësporch ëd registr cujì për dij but generaj, le pàgine visità a smon-o pa al pùblich l'identità d'un visitador. Ij dat ëd registr campionà a peulo anclude l'adrëssa IP ëd qualsëssìa utent, ma sòn a l'é pà visualisà ëd fasson pùblica.

Modifiché ij proget

Le modìfiche a le pàgine a son identificà con lë stranòm o l'adrëssa IP ëd l'editor ant la rej, e la stòria dle modìfiche a l'é agregà për autor ant na lista ëd contribussion. Coste anformassion a saran disponìbij an përmanensa.

Utent registrà intrà ant ël sistema:

J'utent intrà ant ël sistema a smon-o pa al pùblich soa adrëssa IP gavà ij cas d'abus, ch'a comprendo ij vandalism su na pàgina wiki da part ëd l'utent o ëd n'àutr utent con la midema adrëssa IP. L'adrëssa IP ëd n'utent a l'é memorisà sij servent ëd translatewiki.net për un sert temp, e a peul esse vëddùa da j'aministrator dël servent e da j'utent che a l'han avù l'acess ëd Controlor.

J'anformassion an sn'adrëssa IP, e soe conession a qualsëssìa stranòm ch'a la partagia, a peul esse dàita sota serte sircostanse (vëdde sì-sota).

J'editor ch'a deuvro un servent ëd mëssagi professional da ca o ch'a deuvro na conession DSL o Internet, a son fàcij da esse identificà da soa adrëssa IP; an cost cas a peul esse bel fé identifiché tute le contribussion al proget fàite da cola adrëssa IP. Dovré në stranòm a l'é la pi bela manera ëd goerné l'arzervatëssa an costa situassion.

Utent registrà pa intrà ant ël sistema e utent pa registrà:

J'editor ch'a son pa intrà ant ël sistema a peulo esse identificà da l'adrëssa IP ëd rej. Sconda dël tipo dla conession, costa adrëssa IP a peul esse trassàbil a un gròss fornidor dl'Aragnà o ëd fasson pì precisa a na scòla, pòst ëd travaj o ca. A peul esse possìbil dovré coste anformassion an combinassion con d'àutre anformassion, comprèis lë stil ëd modìfica e ij gust, për identifiché n'àutor ëd fasson precisa.

Discussion

Pàgine ëd discussion an sla wiki:

Qualsëssìa pàgina modificàbil a peul esse an teorìa un pòst ëd discussion. An general, le discussion su translatewiki.net a son an sle pàgine ëd ciaciarade dj'utent (associà a dj'utent particolar), an sle pàgine ëd discussion dij proget mantnù (associà a dij proget mantnù particolar) o an dle pàgine progetà pròpe për marcé com dle piasse ëd discussion (pr'esempi, la pàgina d'assistensa). J'aspetative d'arzervatëssa a s'àplico a le pàgine ëd discussion ant la midema manera che a j'àutre.

Për pòsta eletrònica:

J'utent a son pa obligà ëd dé n'adrëssa ëd pòsta eletrònica quand as registro. J'utent ch'a dan n'adrëssa ëd pòsta eletrònica bon-a a abìlito j'àutri utent intrà ant ël sistema a mandeje ëd mëssagi a travers la wiki. Quand a s'arsèiv un mëssagi da n'àutr utent a travers sto sistema, l'adrëssa ëd pòsta eletrònica d'un a l'é pa rivelà. Quand as sern ëd mandé un mëssagi a n'àutr utent, l'adrëssa d'un a l'é visualisà coma speditor.

L'adrëssa ëd pòsta eletrònica butà ant ij gust ëd n'utent a peul esse dovrà da translatewiki.net për soe comunicassion. J'utent dont ij cont a l'han pa n'adrëssa bon-a a podran pa riamposté soa ciav s'a l'han përdula. An costa situassion, an tùit ij cas, j'utent a podran contaté un dj'aministrator dij servent ëd translatewiki.net për anserì n'adrëssa ëd pòsta eletrònica neuva. N'utent a peul gavé l'adrëssa ëd pòsta eletrònica dël cont dai sò gust an qualsëssìa moment për evité ch'a sia dovrà. La corëspondensa privà antra j'utent a peul esse salvà a discression ëd costi utent e a l'é pa sogetà a le régole ëd translatewiki.net.

Su IRC:

Ij canaj IRC a son pa part ofissial ëd translatewiki.net e a marcio pa ant sij servent controlà da translatewiki.net. L'adrëssa IP dj'utent ch'a ciaciaro su col servissi a podrìo esse s-ciairà da j'àutri partissipant. L'arzervatëssa dj'utent IRC su minca canal a peul esse protegiùa conforma a le régole dël servissi e canal rispetiv. Dij canaj diferent a l'han dle régole diferente su com ij registr a peulo esse publicà.

Acess e divulgassion dj'anformassion përsonaj identificàbij

Acess:

Ël proget a l'é dzortut gestì da 'd contributor volontari. Chèich utent pì angagià a l'han dj'acess privilegià. Për esempi, ij livej d'acess ëd n'utent a translatewiki.net a son determinà da la presensa dj'utent an vàire «proget mantnù». Ij drit dle partìe d'utent e ij mèmber dle partìe a son pùblich.

J'àutri utent che a l'han acess a j'anformassion privà identificàbij a comprendo, ma a son pa mach lor, j'utent ch'a l'han acess a la funsion ëd Controlor, j'ampiegà ëd translatewiki.net, ij dipendent, ij contratista e j'agent ampiegà da j'operador ëd translatewiki.net, ij dësvlupador e d'àutri con livej àut d'acess ai servent.

Ël partagi d'anformassion con d'àutri utent privilegià a l'é pa considerà parèj ëd në «spatarament».

Concession: Régole an sla concession dij dat

A l'é la régola ëd translatewiki.net che ij dat përsonaj identificàbij cujì ant ij registr dij servent, o a travers la memorisassion ant la base ëd dàit, a travers la funsion ëd controlor, o a travers d'àutre manere nen disponìbij al pùblich, a peulo esse concedù da dij volontari o da l'echip ëd translatewiki.net ant un-a dle situassion sì-dapress:

1. An rispòsta a na sitassion a comparì vàlida o n'àutra arcesta obligatòria an aplicassion dle laj,
2. Con ël përmess dl'utent an chestion,
3. Quand a l'é necessari për j'anvestigassion ant ij cas d'abus,
4. Quand j'anformassion a anteresso la visualisassion ëd pàgine generà da n'aragn automàtich o un trigomiro e che soa publicassion a l'é necessaria për s-ciairì o arzòlve dij problema técnich,
5. Quand l'utent a l'ha vandalisà dle pàgine o as compòrta con përsistensa ant na manera distrutiva, ij dat a peulo esse concedù a un fornidor ëd servissi, ël trasportator, o d'àutre terse part për assiste ant ël dserne ij blocagi d'IP, o për assiste ant la formulassion d'un reclam al fornidor ëd servissi d'aragnà corëspondent.
6. Quand a smija necessari për protege ij drit, le proprietà o la sicurëssa ëd translatewiki.net, ij sò utent o ël pùblich.

Gavà lòn ch'a l'é spiegà sì-dzora, le régole ëd translatewiki.net a përmëtto pa la distribussion d'anformassion përsonaj identificàbij an gnun-e sircostanse.

Acess ëd terse part e notificassion ëd j'utent registrà quand a s'arsèiv na procedura legal:

Com prinsipi general, l'acess a, e ël mantniment ëd, dat përsonaj identificàbij an tùit ij proget a dovrìa esse mìnim e a dovrìa esse dovrà mach da andrinta për giuté ël proget a marcé bin. Dle vire, tutun, translatewiki.net a peul arsèive n'arcesta ëd comparission o d'àutre arceste obligatòrie da n'organism d'aplicassion dle laj o da na cort ëd giustissia o un còrp governativ equivalent che a ciama dë smon-e dj'anformassion su n'utent registrà, e a peul esse për lej obligà a ubidì a l'arcesta. Ant ël cas ëd n'arcesta legal obligatòria parèj, translatewiki.net a sërcrà d'anformé l'utent tocà ant ij tre di ëd travaj apress cola arcesta an mandandje un mëssagi a l'adrëssa ëd pòsta eletrònica (s'a-i é) che l'utent an chestion a l'ha butà ant ij sò gust.

Translatewiki.net a peul pa dé 'd consèj a n'utent quand a arsèiv na notificassion parèj ch'a toca la lej, ni n'rispòsta aproprià a na notìfica. Translatewiki.net a fà noté, an tùit ij cas, che col utent a peul avej ël drit legal ëd resiste o limité cole anformassion an giudissi an scrivend n'arcesta për fërmé la procedura. J'utent ch'a veulo oponse a n'arcesta a comparì o a d'àutre arceste obligatòrie a dovrìo ciamé n'opinion legal consernent ij drit aplicàbij e le procedure che a peulo esse disponìbij.

Se translatewiki.net a arsèiv na mossion d'un tribunal d'anulé o ëd limité la notìfica com arzultà dl'assion ëd n'utent o ëd sò avocà, translatewiki.net a publicrà pa j'anformassion ciamà fin che translatewiki.net a arsèiv pa n'órdin dal tribunal ëd felo.

J'utent registrà a son pa obligà ëd dé n'adrëssa ëd pòsta eletrònica. Tutun, quand l'utent registrà an chestion a dà pa n'adrëssa ëd pòsta eletrònica, translatewiki.net a podrà pa anformé col utent con un mëssagi privà quand a arsèiv d'arceste da la lej dë smon-e dj'anformassion përsonaj identificàbij an sl'utent.

Avis

Translatewiki.net a chërd che mantnì e preservé l'arzervatëssa dij dat dj'utent a l'é un valor amportant. Costa Règola d'Arzervatëssa e j'assion ëd translatewiki.net a rapresento në sfòrs e n'ampegn a goerné la sigurëssa dj'anformassion limità dl'utent ch'a son cujìe e mantnùe sij nòstri servent. An tùit ij cas, translatewiki.net a peul pa garantì che j'anformassion dj'utent a restran privà. I arconossoma che, bele ch'i së sforsoma e ampegnoma a protege j'anformassion privà dj'utent, dle përson-e a podrìo anco' dësvlupé dij métod d'estrassion ëd dàit e d'àutri për dëscoaté cole anformassion e spatareje. Për costa rason, translatewiki.net a peul dé gnun-e garansìe contra l'acess nen autorisà a j'anformassion dàite durant la partecipassion ai proget translatewiki.net o a le comunità colegà.

In cases of conflicting information between a translated version of this page and the original version in the English language, the English version will take precedence over the translated version.